Mar 2 | NdeIBE | STEP | Ngemva kwezinsukwana, uJesu esengenile njalo eKhaphenawume, abantu bezwa ukuthi wayesebuyile ekhaya.

Mark 2

UJesu Usilisa Owome Umhlubulo

1 Ngemva kwezinsukwana, uJesu esengenile njalo eKhaphenawume, abantu bezwa ukuthi wayesebuyile ekhaya. 2 Bathi cwi ndawonye kwaze kwasweleka indawo kanye laphandle. Watshumayela ilizwi kubo. 3 Kwafika amadoda eletha owayome umhlubulo ethwelwe ngabane babo. 4 Kwathi ngoba bengafinyeleli kuJesu laye ngenxa yesixhobexhobe bavula intuba ephahleni malungana loJesu, baphendla behlisela isendlalo esasilele indoda eyome umhlubulo. 5 Kwathi uJesu ebona ukholo lwabo wathi endodeni eyome umhlubulo, “Ndodana, izono zakho sezithethelelwe.”

6 Kwakuhlezi khonapho abanye babafundisi bomthetho, benakana besithi, 7 “Umuntu lo ukhulumeleni kanjalo? Uyahlambaza! Ngubani ongathethelela izono ngaphandle kukaNkulunkulu yedwa?”

8 Masinyane uJesu wakwazi emoyeni wakhe ukuthi yilokho ababekucabanga ezinhliziyweni zabo, wasesithi kubo, “Linakanelani izinto lezi?

9 Yikuphi okulula: ukuthi kowome umhlubulo: ‘Izono zakho sezithethelelwe,’ loba ukuthi, ‘Phakama, thatha icansi lakho uhambe’?

10 Kodwa ukuze lazi ukuthi iNdodana yoMuntu ilamandla emhlabeni ukuthethelela izono … ” Wathi kowome umhlubulo, 11 “Ngiyakutshela ngithi phakama, thatha icansi lakho uye ekhaya.” 12 Waphakama wathatha icansi lakhe wahamba waphuma bonke bemkhangele. Lokho kwamangalisa umuntu wonke, bamdumisa uNkulunkulu besithi, “Kasikaze sikubone okunje!”

Ukubizwa KukaLevi

13 UJesu waphinde wayahambahamba eduzane lechibi. Isixuku esikhulu sabantu seza kuye, wasebafundisa.

14 Wathi elokhu ehambahamba wabona uLevi indodana ka-Alifewu ehlezi esakhiweni sokuthelisa. UJesu wathi kuye, “Ngilandela.” ULevi waphakama wamlandela.

15 Kwathi uJesu esidla okwakusihlwa endlini kaLevi kwakulabathelisi abanengi “lezoni” besidla laye kanye labafundi bakhe, ngoba babebanengi ababemlandela. 16 Kuthe abafundisi bomthetho ababe ngabaFarisi bembona esidla “lezoni” labathelisi babuza abafundi bakhe bathi, “Wenzelani ukudla labathelisi kanye “lezoni”?”

17 Wathi ekuzwa lokho uJesu wathi kubo, “Kakusibo abaphilayo abaswela inyanga, kodwa ngabagulayo. Kangilandanga ukuzabiza abalungileyo, kodwa izoni.”

UJesu Ubuzwa Ngokuzila

18 Ngalesosikhathi abafundi bakaJohane labaFarisi babezila. Abanye abantu beza babuza uJesu bathi, “Kungani abafundi bakaJohane labafundi babaFarisi bezila kodwa abakho kabazili?”

19 UJesu waphendula wathi, “Izethekeli zomyeni zingazila kanjani na esesekhona lazo? Zingeke, nxa elokhu ekhona lazo. 20 Kodwa siyeza isikhathi lapho umyeni ezasuswa kuzo, mhlalokhoke zizazila.

21 “Kakho othungela isichibi selembu elitsha esigqokweni esidala. Aluba ekwenza lokho isichibi esitsha sizadonsa okudala kwengeze ukudabuka.

22 Njalo kakho othela iwayini elitsha emigodleni yezikhumba emidala. Angakwenza lokho iwayini lizaziqhekeza izikhumba kuthi iwayini kanye lemigodla leyo yezikhumba kuhle konakale. Hatshi, uthela iwayini elitsha emigodleni yezikhumba emitsha.”

INkosi YeSabatha

23 Ngelinye iSabatha uJesu wayedabula emasimini amabele, kwathi abafundi bakhe belokhu behamba bakha izikhwebu zamabele.

24 AbaFarisi bathi kuye, “Khangela, bakwenzelani ukwephula umthetho ngokwenza lokhu ngeSabatha na?”

25 Waphendula wathi, “Kalifundanga yini okwenziwa nguDavida labakhula bakhe lapho basebelambile sebeswele?

26 Ngezinsuku zika-Abhiyatha umphristi omkhulu wangena endlini kaNkulunkulu wadla isinkwa esingcwelisiweyo, esivunyelwe ukudliwa ngabaphristi kuphela. Futhi wasabela abakhula bakhe.”

27 Wasesithi kubo, “ISabatha lenzelwa abantu, hatshi ukuthi umuntu wenzelwa iSabatha. 28 Yikho iNdodana yoMuntu iyiNkosi njalo yeSabatha.”